最近短短個幾禮拜裡面一連睇左3套戲, 分別係[20世紀少年], [鷹眼追擊], 同埋[畫皮]。 [20世紀少年]本身由漫畫改篇, 我自己未睇過, 但係就有睇過作者另一部作品Monster。個作者畫既故事比較特別同另類, 係營造氣氛方面都算有一手, 但係就有d虎頭蛇尾, 所以 Monster個結局都幾平凡。 講番呢套戲, 我本身已經知道[20世紀少年] 係三部曲既第一集, 所以期望不大, 結果俾我既感覺都係好有虎頭蛇尾既感覺。 前半部既氣氛其實造得唔錯, 主角一步一步回憶過去搵真相時都幾緊張。 後半部就好唔同, 劇情跳得快之餘又過份地天馬行空, 好似睇緊以前果既 XX戰隊咁, 搞到我差得以為係第二個導演拍既。可能因為我未了解清楚成個故事啦, 或者睇埋之後果兩集會好d, 但係以戲論戲, 呢套野真係麻麻地。

[鷹眼追擊] 個concept其實都幾似以前果套[智能叛變]。本身算係一部不過不失既荷理活中型製作, 每樣應該有既元素都有d, 熱熱鬧鬧咁就完場。 老實講, 由於佢個故事同埋主角表現唔算特出, 所以出黎既效果一d都唔深刻。 [智能叛變] 我依家仲幾記得佢既內容, 反而呢套[鷹眼追擊] 我已經開始唔記得中間發生過既野。

3套戲中, 我最鐘意既就係[畫皮]。 其實本身我係因為見客既中間有幾個鐘既gap, 所以決定自己去睇套戲打發時間, 點知都算比到下驚喜我。其實[畫皮]個故事唔算太特別, 但係劇情算係推進得宜又完完整整, 每個人物對愛情各有各執著, 都算幾有味道。 最值得讚係幾位主角, 我一向覺得甄子丹又型又好打, 今次係套戲度仲負責搞埋笑。陳坤都發揮得唔錯, 而趙薇同周迅既造型就真係好鬼死靚。尤其係周迅, 絕對係一個好適合拍古裝片既靚女! 總括黎講, [畫皮] 絕對值得推薦, 不過由於個故事屬於一個愛情故事多過一部鬼片, 所以建議拍住拖去睇。

哈哈哈, 寫下寫下好似變左寫影評。無辦法啦, 市道唔好, 唯有試下多方面發展。

收拾心情, 我訂立左一個短期目標...... 呢季要到數

9月9日晚, 阿公終於離開左。

當時我係BU度上緊堂, 落堂後見到電話有幾個miss call已經覺得有d唔妥。打番去俾我阿媽先知道呢個壞消息已經發生左幾個鐘, 成班屋企人係醫院見完阿公最後一面準備離開, 所以我成為左當日唯一無去到既人 (呢樣野令我到依家都覺得唔開心)。

記得坐地鐵返企時, 有一刻我忍唔住流左眼淚出黎, 我驚人見到, 唯有勁望住窗外面。係公眾地方喊, 我記得只有係我幾年前同女朋友分手時試過。

本來我呢幾日心情已經開始平復, 點知頭先我見到我表妹寫xanga, 講起阿公(佢爺爺)點對佢好, 我忍唔住諗起佢臨入院前同我講既最後一句話。

佢問我, 依家份工做成點? 每個月搵幾多? 佢係度關心我既工作情況。

然後我又諗起每次去佢屋企, 佢總會囉盒檸檬茶俾我(因為佢知道我鐘意飲)。每次埋位食飯, 佢最關心係我坐係邊, 佢總係想留個最好既中間位俾我, 次次我見到有其他長輩同表弟妹係度, 都好唔好意思咁拒絕佢既好意而坐埋一邊。

呢d回憶, 會永遠係我心裡面, 我亦都唔想再係度講出黎。事關我打字打到呢度, 我發覺自己d眼淚又係停唔到落黎…

夠喇, 真係夠喇。

今日係我呢個禮拜第三次去醫院, 探我阿公, 佢今日仍然好辛苦咁用氧氣罩幫佢呼吸, 不過某程度都總算係清醒既, 對我地講既野會點頭同搖頭做反應。其實心理準備我已經一早有, 因為佢新驗出黎既肺癌已經係第三期, 以佢將近九十歲既身體好難支持到。唯一希望既係佢既肺炎可以好轉, 等佢無咁辛苦, 就算係幾個月都好, 令我地所有屋企人可以盡我地各自既責任陪佢走完最後呢段路。對我黎講, 我最想既就係陪佢行多次奧海城, 飲多一次茶。

就係打呢短短既百幾字, 我一個人已經係電腦前喊到收唔到聲。

全靠奧運, 我今年既生日竟然都好多人記得, 係度約略記錄下呢幾日各路好朋友幫我慶祝既情況。

7號晚去左Paul既將軍澳屋企, 成員有Paul夫婦同Ivy。成晚最特別既係個蓮花蠟燭, 今次其實係我第二次見到佢, 但係就係我第一次自己點著佢。哈哈, 點果時真係好似點煙花咁, 離開成一米驚佢爆炸, 好好玩。呢個係我今年既第一個蛋糕。

8號正日我成班恆生同事去左我屋企玩, 我地一邊睇奧運開幕禮一邊食壽司, 之後就係度玩Pictionary。我覺得今年既開幕禮真係好精彩, 除左中間果段二百幾隊慢慢操出黎時比較無聊外, 其餘部份都幾過癮。最好笑係Cedric帶左個”單身” 既女仔黎一齊玩, Dilys又話要夜d帶我去蘭桂坊會會佢d朋友, 睇黎大家”關心”我之餘又真係幾多貨係手…呢晚食左我今年第二個蛋糕。

9號…其實應該係8號既延續, 事關我班同事係夜晚12點幾走左後, 我就去左Johnny屋企, 同3大高手黎個Puerto Rico大戰。哈哈哈, 原來生日對戰意係無幫助架, 成晚玩得都唔係好順, 同平時一樣玩到朝早6點幾就返企訓覺。夜晚本來想係屋企休息, 但係由於之前曾經同過霍佳講, 如果佢今個禮拜返教會我就會返, 點知佢無俾我拋到, 佢sms講到明真係會返…所以我唯有累到死下死下咁返團契。結果呢, 都好, 成二十人陪我切我今年第三個蛋糕。

10號朝我盡情訓覺, 係中午3點幾先出發去Joyce屋企。我地睇左陣奧運後, 就又黎我地既雙料娛樂, 一臺打牌一臺玩Puerto Rico。夜晚我地去左黃埔食韓燒, 味道真係幾唔錯 (不過都唔平, 所以搞到我果幾十蚊麻雀數都唔好意思收)。呢日我食左我今年既第四個蛋糕。

除左因為又老一歲比較令人擔心外, 今年真係幾開心。我每次切餅前許願都只係許左同一個願, 我估咁樣concentrate d應該會靈d掛。

不過, 美中不足係尋日見到兩個消防員殉職既新聞。